ភ្នំពេញ៖ ក្រុមហ៊ុនជប៉ុន Mizuda បានលើកឡើងពីបំណងក្នុងការបង្កើតរោងចក្រអគ្គិសនីដុតសម្រាមនៅរាជធានីភ្នំពេញ បន្ទាប់ពីក្រុមហ៊ុននេះបានប្រតិបត្តិការប្រមូលសម្រាមក្នុងរាជធានីភ្នំពេញជាង ២ឆ្នាំមកនេះ។

ថ្លែងក្នុងជំនួបជាមួយអភិបាលរាជធានីភ្នំពេញ កាលពីថ្ងៃទី២៨ ខែមីនា ឆ្នាំ២០២៣ អគ្គនាយកក្រុមហ៊ុន មីហ្ស៊ីដាគ្រុបជប៉ុន លោក Shan Jian Ming បានលើកឡើងថាឆ្លងតាមបទពិសោធន៍របស់ក្រុមហ៊ុនជាង ២ឆ្នាំមកនេះ ក្រុមហ៊ុនចង់ពង្រីកការវិនិយោគរបស់ខ្លួនលើការដុតសម្រាមជាអគ្គិសនីថែមទៀត ដោយសារតែនៅប្រទេសចិន ក្រុមហ៊ុន មីហ្ស៊ីដាគ្រុប បានអនុវត្តន៍ដោយជោគជ័យនូវរោងចក្រដុតសំរាមទៅជាអគ្គិសនីចំនួន៣៣រោងចក្ររួចហើយ។

អភិបាលរាជធានីភ្នំពេញ លោក ឃួង ស្រេង បានប្រកាសស្វាគមន៍ចំពោះគំនិតនេះ តែការសម្រេចយ៉ាងណាស្ថិតនៅលើរដ្ឋាភិបាល។

លោកថា៖ «ការងារនេះជាការងារដែលសម្រេចដោយរាជរដ្ឋាភិបាលកម្ពុជា តែសម្រាប់ខ្ញុំ គឺខ្ញុំសូមគាំទ្ររាល់គម្រោងនេះ។ តែបើរាជរដ្ឋាភិបាលកម្ពុជាផ្តល់លទ្ធភាពឱ្យរដ្ឋបាលរាជធានីភ្នំពេញ ជាអ្នកចាត់ចែងនោះរដ្ឋបាលរាជធានីភ្នំពេញនឹងផ្តល់ជូនក្រុមហ៊ុន មីហ្ស៊ីដាគ្រុប មុនគេ»។

គួរឱ្យដឹងផងដែរថាបច្ចុប្បន្នមានក្រុមហ៊ុនចំនួន៣ បានប្រតិបត្តិការប្រមូលសម្រាមក្នុងរាជធានីភ្នំពេញ ចាប់តាំងពីថ្ងៃទី១ ខែកក្កដា ឆ្នាំ២០២១ មកដល់បច្ចុប្បន្ន ខណៈមានសម្រាមប្រមាណ ៣ពាន់តោនត្រូវបានប្រមូលប្រចាំថ្ងៃ៕